ACTION AGAINST HUNGER YAKABIDHI ZANA ZA KILIMO CHA BUSTANI ZA MBOGA NA MATUNDA KATIKA SHULE SITA ZA SEKONDARI

Posted on: June 4th, 2024

Shirika la Action Against Hunger linalotekeleza mradi wa Lishe na Afya wa  Gender Equitable Nutrition in Tanzania and Uganda (GENTU) kwa kushirikiana na shirika la SEMA leo tarehe 4/6/2024 limekabidhi zana za kilimo cha bustani  katika Halmashauri ya Wilaya ya Itigi kwa lengo la  kurahisisha shughuli za kilimo cha mboga na matunda shuleni kwa ajili ya kuboresha chakula cha wanafunzi wanaokula shuleni sambamba na utekelezaji wa Mkataba wa Lishe

Akipokea vifaa hivyo Kaimu Mkurugenzi wa Halmashauri ya Itigi Suzana Mushi ameshukuru Shirika hilo na kusema kuwa vifaa hivyo vitasidia shule husika katika kuzalisha mazao ya mboga na matunda kupitia kilimo cha bustani pamoja na kudumisha usafi katika mazingira ya shule.

Shule zitakazo nufaika na msaada wa vifaa hivyo vya kilimo kutoka Shirika la Action Against Hunger ni Shule ya Sekondari ya Mgandu, Sanjaranda, Idondyandole, Mitundu, Kalekwa na Kamenyanga ambapo zana zilizotolewa ni Toroli 12, Reki 18, Majembe ya mkono 19, Keni 24, Mikasi 24, Beleshi 18 ambavyo kwa jumla vimegharimu kiasi cha TZS 3,292,000/=.