ALMASI YA ITIGI NI PAMBA; MWANRI

Posted on: October 16th, 2022

Wakazi wa Halmashauri ya Wilaya ya Itigi wameshauriwa kulima zao la pamba kama miongoni mwa mazao ya biashara kwa kuwa jografia yake inaruhusu zao hilo kustawi.

Akizungumza na wanachi katika ziara maalumu katika halmashauri hiyo  iliyoanza tarehe 13-14 Oktoba 2022 ya kuhamasisha kilimo cha zao la pamba Balozi wa pamba Tanzania Ndg.Agrey Mwanri amesema  halmashauri ya Itigi ina eneo kubwa na zuri kwa ajili ya kilimo na hususani kilimo cha pamba kwa kuwa zao hilo linahitaji mvua za wastani ambazo ni asilimia hamsini(50%) ya mvua zinazonyesha  katika mikoa ya kanda ya kati.

Amesema kuwa Mkoa wa Singida umepitisha azimio kua kila mwananchi kwa kuanzia alime angalau heka moja ya zao la pamba huku akibainisha kuwa serikali ya Awamu ya sita inayoongozwa na Mh. Samia Suluhu Hassani rais wa Jamhuri ya Muungano wa Tanzania imeshatoa mbolea za ruzuku sanjari na pembejeo nyingine kama mbegu na viuatilifu ambavyo wakulima watapatiwa kwa mkopo kupitia Bodi ya pamba (TCB).

Aidha Mwanri amesema kuwa  serikali imeandaa soko la uhakika la pamba kwa bei elekezi  ya Tsh 1600 kwa  kilo huku makampuni mengine yanayonunua pamba  ikiwemo  Bio Sustain Tanzania Limited wananunua pamba kwa ts, 2000 kwa kilo na kuwataka wananchi  wa halmashauri ya Itigi kuchangamkia fursa hiyo.

Kwa upande wake Afisa kilimo wa halmashauri ya Wilaya ya Itigi Bw. Mkinguzi Mgalula amesema Halmashauri imejipaga kutekeleza mpango huo kwa kuwasaidia wakulima waweze kulima kilimo cha kisasa cha zao la pamba ili waweze kupata tija .

Nae Bi Maria Mtonyi mkazi wa kijiji cha Gurungu na Bw. Herman Sifuni wameshukuru serikali kwa  kwa kupatiwa semina hiyo kupitia kwa Balozi wa pamba nchini Ndg. Agrey Mwanri na kwamba imeamsha ari ya kulima zao hilo ambalo kwa kiasi kikubwa wananchi wa maeneo hayo walishakata tama kutokana na changamoto mbalimbali zilizokuwepo ikiwemo ukosefu wa soko la uhakika .

Ziara hiyo katika halmashauri ya Itigi imehusisha vijiji sita ikiwa ni pamoja na  Idodyandole,Mwamatiga,Makuga ,Doroto,Kashamawele na Gurungu.

Mwisho