HALMASHAURI YA ITIGI YATOA MAFUNZO YA MAPISHI DARASA

Tarehe ya Kuwekwa: March 16th, 2022

             HALMASHAURI YA ITIGI YATOA MAFUNZO YA  MAPISHI DARASA

Jamii imetakiwa kuzingatia ulaji wa mlo kamili wenye viini lishe kutoka makundi matano ya chakula ili kuwa na jamii yenye afya kamilifu.

Wito huo umetolewa na Mratibu wa lishe na Muuguzi Mkuu wa Wilaya Ndg. FREDERICK GAISHA katika ziara ya kuhamasisha jamii juu ya mlo kamili kutoka makundi matano ya chakula kupitia MAPISHI DARASA iliyofanywa na Idara ya afya ya halmashauri ya Wilaya aya Itigi kwa niaba ya Mganga mkuu wa halmashauri kwa kushirikiana na Shirika la Action Against Hunger pamoja na wadau wa afya wa Kata na Vijiji.

Amesema kampeni hiyo ya uhamasishaji ililenga kutoa elimu ya vitendo jinsi ya kuandaa uji ulio boreshwa kwa kutumia makundi matano ya vyakula vinavyopatikana katika maeneo yao.

Aidha mwakilishi kutoka Shirika la Action Against Hunger Bwana Hilari Makundi amesema ziara hiyo pia ililenga kufanya tathimini ya lishe kwa watoto wa umri wa chini ya miaka mitano sambamba na kuhamasisha wanawake na akina mama kuhudhuria kliniki ya ujauzito kabla ya miezi mitatu ya ujauzito na kujifungulia katika vituo vya kutolea huduma za afya.

Amefafanua kuwa faida za kuanza kliniki mapema ni pamoja na kupunguza vifo vitokanavyo na uzazi na vya watoto wachanga,kupunguza idadi ya watoto wanaozaliwa na uzito pungufu  na kuhamasisha juu ya  kujiunga na CHFiliyoboreshwa.

Baadhi ya vijiji vilivyo nufaika na ziara hiyo ni pamoja na Idodyandole,Tambukareli,Kalangali,Ipalalyuu,Mabondeni,Zinginali,Mgandu na Lulanga.