H'W YA ITIGI YASAINI MKATABA WA LISHE

Tarehe ya Kuwekwa: November 3rd, 2022

Mwenyekiti wa Halmashauri ya Wilaya ya Itigi Mh. Hussein Simba ameshuhudia utiaji Saini utekelezaji wa Mkataba wa Lishe uliofanyika kati ya Mkurugenzi Mtendaji wa Halmashauri ya Wilaya ya Itigi na watendaji wa Kata 13 za Wilaya hiyo.

Awali akizungumza na watendaji hao Mhe Simba amewataka kuzingatia na kutekeleza maelekezo yote yaliyo katika Mkataba huo ili kuwezesha kufikia lengo na jamii yenye Afya.

Aidha,amewaagiza watendaji wa Kata kuhakikisha wanasimamia shughuli za Lishe kwenye Shule zilizo katika maeneo yao ili Wanafunzi wapate Chakula wawapo Shuleni.

Kwa Upande wake Mkurugenzi Mtendaji wa Halmashauri ya Wilaya ya Itigi amewataka watendaji kutoa taarifa sahihi na kwa wakati za utekelezaji kila robo ambayo itakuwa unapima kiwango cha utekelezaji wa Mkataba huo.

Nae Mganga mkuu wa halmashauri ya Wilaya ya Itigi Dkt. Emmanuel Mallange amewasisitiza watendaji wa kata pamoja na waganga wafawidhi kufanya kazi kwa kushirikiana na walimu kwa shule zinazotoa chakula kwa wanafunzi ili kufanikisha utekelezaji wa maagizo yaliyopo katika mkataba huo wa Lishe.

Awali akitoa taarifa,Afisa Lishe wa Halmashauri ya Itigi Bi. Pendo Kabamba amesema kuwa Idara itahakikisha inafuatilia kwa makini utekelezaji wa mkataba huo uliohuishwa katika ngazi zote za serikali za mitaa sambamba na kuendelea kutoa elimu ya lishe kwa wananchi ili kujenga jamii imara na yenye afya.