ITIGI DC KUPITISHA RANDAMA YA BAJETI 2023/2024

Tarehe ya Kuwekwa: February 8th, 2023

Halmashauri ya Wilaya ya Itigi imepitia na kupitisha mpango wa bajeti ya zaidi ya bilioni ishirini na sita kwa mwaka 2023/2024 kwa ajili ya kutekeleza shughuli mbalimbali za halmashauri.

Akizungumza katika kikao Kikao cha Baraza la Halmashauri cha Kujadili randama ya Bajeti ya Mwaka 2023/2024 Mwenyekiti wa Halmashauri Mh. Hussein Simba amesema halmashauri ya Itigi imeendelea kufanya vizuri katika ukusanyaji wa mapato pamoja na utekelezaji wa miradi mbalimbali ya maendeleo .

Aidha  amemshukuru Rais wa Jamhuri ya Muungano wa Tanzania Mh.Dkt Samia Suluhu Hassani kwa kuendelea kuipatia halmashauri hiyo fedha nyingi kwa ajili ya kutekeleza shughuli mbalimbali za halmashauri huku akiwataka madiwani kusimamia miradi ya maendeleo inayotekelezwa katika maeneo yao.

Akiwasilisha taarifa ya Randama ya Mpango wa bajeti ya mwaka 2023/2024 Mkuu wa Divisheni ya Mipango Emmanuel Dyelu amesema halmashauri imeomba kuidhinishiwa takribani 8,112,907,000.00 kwa ajili ya miradi mbalimbali ya maendeleo.

Dyelu ameainisha baadhi ya vipaumbele vya bajeti hiyo kuwa pamoja na mambo mengine halmashauri imepanga  kununua wa vishikwambi kwa ajili ya madiwani na wataalamu katika ofisi ya Mkurugenzi Mtendaji,Kutekeleza mpango wa kutenga asilimia kumi kwa ajili ya vijana,wanawake na watu wenye ulemavu,kuboresha miundombinu ya elimu na Afya pamoja na kuandaa mpango kabambe wa halmashaur(Master Plan) ili kwenda na kasi ya ukuaji wa mji.

Kwa upande wake Diwani wa kata ya Itigi mjini Mh. Ali Minja akichangia mjadala huo wa Bajeti ameshauri halmashauri  kutenga fedha kwa ajili ya kujenga barabara mpya katika maeneo yasiyo na miundombinu hiyo ili kuongeza thamani ya maeneo /viwanja vinavyouzwa na halmashauri pia kuzijumuisha Shule za Msingi Itigi na Mlowa katika mpango wa kuzikarabati shule kongwe.