MAADHIMISHO SIKU YA UKIMWI

Tarehe ya Kuwekwa: December 10th, 2024

Jamii imetakiwa kuwa mabalozi wa kupinga  vitendo vya ukatili wa kijinsia dhidi ya wanawake,Watoto na watu wenye makundi maalumu pamoja na kuepuka unyayapaa kwa watu wanaoishi na virusi vya UKIMWI.

Hayo yamesemwa na Mgeni rasmi,Makamu Mwenyekiti wa Halmashauri ya Wilaya ya Itigi Mhe.Jonathani Dulle,diwani wa Kata ya Mwamagembe katika maadhimisho ya Siku ya UKIMWI sambamba na maadhimisho ya siku 16 za kupinga ukatili yaliyofanyika katika viwanja vya sendi ya zamani mjini Itigi.

Mhe.Dulle ameitaka jamii kuhakikisha inazingatia ulinzi na usalama wa wahanga wa ukatili wa kijinsia kwa kuendelea kupinga na hata kutoa taarifa za vitendo vya ukatili wa kijinsia kwa mamlaka za kiserikali.

Aidha ameikumbusha jamii kupima na kutambua afya zao ili waweze  kuchukua hatua stahiki sanjari na kuepuka vitendo vinavyoweza kusababisha maambukizi ya virusi vya UKIMWI.

Awali akisoma taarifa kwa mgeni rasmi Mratibu wa UKIMWI halmashauri ya Wilaya ya Itigi Fredi Lotti amesema halmashauri ina asilimia 3 ya watu wanaoishi na maambukizi ya UKIMWI huku idadi ya watu wanaotumia dawa za kufubaza makali ya virusi ni 3.751

Lotti amesema halmashauri imeendelea kutoa elimu kuhusu njia za kujikinga na maambukizi,ushauri nasaha,upimaji wa virus vya UKIMWI kwa hiari.

Maadhimisho ya siku ya UKIMWI duniani mwaka 2024 yamebeba kaulimbiu’’ Chagua Njia sahihi tokomeza UKIMWI’’ huku kaulimbiu ya Maadhimisho ya Siku16 za kupinga Ukatili wa kijinsia ikiwa ni’’Chagua kutokomeza Ukatili wa Kijinsia’’