NITASHUGHULIKIA MALALAMIKO YA AJIRA SGR-DC,MANYONI

Tarehe ya Kuwekwa: November 12th, 2022

Mkuu wa wilaya ya Manyoni  Bi.Rahabu Mwagisa amesema atafuatilia kwa makini utaratibu unaotumika kutoa ajira  katika mradi wa ujenzi wa reli ya treni ya mwendokasi kutoka na kuwepo kwa malalamiko mengi kutoka kwa wananchi.

Akizungumza na wakazi wa Mji wa Itigi katika mkutano wa hadhara uliofanyika katika Kijiji cha Songambele,kata ya Tambukareli Mkuu huyo wa Wilaya ya Manyoni amesema mradi wa SGR unatarajia kutoa nafasi za ajira takribani mia tano kwa Wilaya ya Manyoni na kwamba ajira hizo zitatolewa kwa awamu.

Baada ya kusikiliza kero na maoni mbalimbali kutoka kwa wananchi waliofika katika mkutano huo  Mwagisa amesema kuwa amepokea meseji nyingi za malalamiko kutoka kwa wananchi juu ya namna ajira hizo zinavyotolewa na kupelekea wananchi kukosa imani na mchakato mzima wa zoezi hilo.

Amebainisha kuwa utaratibu wa ajira ulivyo katika mradi huo ni kwamba wananchi katika maeneo yanayopitiwa na mradi wanapaswa kupewa kipaumbele lakini amekuwa akipokea malalamiko kuwa wanao ajiriwa ni wageni kutoka nje ya maeneo mradi ukakopitia.

Mkuu huyo wa Wilaya amesema amesema atakutana uongozi wa Kampuni ya Yapi Markez  inayotekeleza mradi wa SGR ili kuzungumzia suala hilo .

‘’Nitakutana na Waturuki nifanye nao mkutano nadhani kuanzia wiki ijayo ili tuweze kubaini tatizo lilipo, kama ni wao au kuna watu wanatumika tuweze kudili nao’’alisema Mwagisa

Baadhi ya wananchi waliozungumzia suala hilo mbele ya Mkuu wa wilaya aliye ambatana na timu yake ya wataalamu kutoka Manyoni pamoja na halmashauri ya Itigi ni pamoja na Bwana Mayoi Elieza,Hamisi Samade na Yussuf Muhuta wamebainisha changamoto za mchakato wa upatikanaji wa ajira katika mradi wa SGR ni pamoja na umbali wa mahali/ kituo cha kufanyia usaili ambapo kwa sasa wanalazimika kwenda Tabora,pamoja na kuwepo kwa viashiria vya rushwa na kumuomba Mkuu wa wilaya kuwasaidia ili anayestahili kupata ajira  apate.