SERIKALI KUBORESHA HALI YA WAZEE

Tarehe ya Kuwekwa: October 17th, 2024

• 
  

  Katika kuhakikisha Wazee wanapata huduma stahiki za afya serikali Imeendelea kuwapatia vitambulisho vya matibabu bure za bima za afya iliyoboreshwa (CHF) ambapo kwa mwaka 2023-2024 wazee 46,995 wametambuliwa nakuendelea kupatiwa huduma za matibabu bure.
  
  Hayo yamesemwa na Mganga Mkuu wa halmashauri ya Wilaya ya Itigi Dkt.Emmanuel Mallange kwa niaba ya Mkuu wa Mkoa wa Singida Mhe.Halima Dendego katika Maadhimisho ya Siku ya Wazee Duniani ambapo kimkoa yamefanyika katika halmashauri ya Wilaya ya Itigi
  
  Dkt.Mallange amesema sambamba na huduma za afya kwa wazee serikali imeendelea kuboresha makazi ya Wazee ya Sukamahela pamoja na kutekeleza mikakati ya Kutokomeza Ukatili dhidi ya Wazee
  
  Awali akisoma risala Katibu wa Baraza la Ushauri la Wazee Ndg.Ramadhani Tuji ameiomba serikali kuimarisha madirisha ya wazee katika vituo vya kutolea huduma,kutoa misamaha mbalimbali kama vile msamaha wa kodi za majengo na huduma za matibabu
  
  Aidha ameimba serikali kuwashirikisha Wazee katika vikao mbalimbali vya maamuzi ili waweze kutoa ushauri
  
  Kwa upande wake Kaimu Mganga Mkuu wa Mkoa wa Singida Dkt.Shila Mwashiuya ameitaka jamii kuwajali wazee ili waweze kuzeeka kwa heshima huku akiwasisitaza wazee kwenda kujiandikisha kwenye orodha ya mpiga kura pamoja na kuhamasisha vijana kujiandikisha ili waweze kushiriki kupiga kura katika uchaguzi wa Serikali za mitaa .