SHAMBA LA SERIKALI LA KITARAKA KUFANYIWA UENDELEZWAJI

Posted on: July 8th, 2023

Shamba la serikali lililopo katika Halmashauri ya wilaya ya Itigi Mkoani Singida lipo katika mpango wa kufanyiwa uendelezaji na serikali ili kuleta tija kwa taifa  

Akizungumza na wananchi katika vijiji vya Kitaraka,Doroto na Kazikazi vinavyopakana na shamba hilo lenye ukubwa wa takribani ekari elfu 45  Mkurugenzi msaidizi kutoka ofisi ya Waziri Mkuu na Mratibu wa Kamati ya Wataalamu ya kufanya utambuzi na tathmini ya shamba hilo Bi. Lina Kitosi amesema katika nyakati tofauti serikali imekua ikiangalia namna bora ya matumizi ya shamba hilo.

Amesema serikali ina nia thabiti ya kulifanyia uendelezaji shamba hilo hivyo Kamati inahitaji taarifa sahihi kuhusu idadi ya wananchi wanaolima katika shamba hilo ili serikali iweze kupanga matumizi kwa utaratibu unaofaa ili kuepuka mgogoro na kuwa na maslahi kwa pande zote mbili.

Naye Mbunge wa Jimbo la Manyoni magharibi Mhe. Yahaya Massare amewataka wananchi kutokuwa na hofu kwa kuwa serikali inataka kutambua eneo la shamba hilo na kuandaa mgawanyo kwa ajili ya matumizi ya serikali pamoja na wananchi huku akiimba Kamati hiyo kuchukua maoni ya wananchi ili kuepusha migogoro.

Kwa upande wake Mwenyekiti wa halmashauri ya wilaya ya Itigi Mhe. Hussein Simba amewaomba wananchi kutoa ushiikiano kwa Kamati inayoratibu zoezi hilo na kukubali maelekezo kwa kuwa lengo la serikali ni kuhakikisha shamba hilo linapangwa na  kutumika kwa njia inayofaa kwa maslahi ya taifa.

Baadhi ya  wakulima wanaolima katika shamba hilo Bw.Stephano Mwakijengi na Jackson Philipo wakaazi wa kijiji cha Kitaraka wameiomba serikali kufanya tathmini yakinifu ili kubaini maeneo ambayo yanaweza kutengwa kwa ajili ya matumizi ya wananchi kwa shughuli za kilimo na ufugaji.

Kamati hiyo maalumu imejumisha wajumbe kutoka ofisi ya Waziri Mkuu,ofisi ya Rais TAMISEMI,Wizara ya mifugo,Maliasili,Ardhi,Mambo ya ndani,Ujumbe kutoka ofisi ya mkuu wa Mkoa wa Singida pamoja na wataalamu kutoka Halmashauri ya wilaya ya Itigi