SITAKI KUONA MTU ANACHEZA NA WATOTO WA SHULE-RC DENDEGO

Posted on: November 10th, 2024

Mkuu wa Mkoa wa Singida Mhe.Halima Dendego amesisitiza ulinzi kwa wanafunzi hususani wa jinsia ya kike wakiwa ndani na nje ya shule ili kuwawezesha kuzifikia ndoto zao za maisha pamoja na kuwawezesha kusoma katika mazingira bora na rafiki kwao.

Ameyasema hayo Novemba 7,2024 katika Shule ya Sekondari Kitaraka katika Halmashauri ya Itigi alipokwenda kukagua mradi wa ujenzi wa nyumba ya mwalimu(Two in One)kupitia Programu ya maendeleo ya Sequip.

Mhe.Dendego amesema licha ya kuwa serikali na jamii inatumia nguvu kubwa kuwalinda watoto wa kike dhidi ya ulaghai unaoweza kupelekea ndoto zao kuharibika,lakini ni wajibu wao kuhakikisha wanajilindavpoa kwa kujiheshimu na kujiweka mbali na ushawishi wa wote ambao wanaonyesha dalili mbaya dhidi yao kwani ikiwa watapata ujauzito wakiwa katika masomo ni wazi kuwa nao wameshiriki katika kujiweka katika matatizo hivyo ni wazi nao watawajibika na sio upande wa mwanaume pekee.

"Wanafunzi ni nyara za serikali zenye gharama kubwa sana,ndio sababu serikali ikaweka sheria ya miaka thelathini kwa watakaokiuka na kuwalaghai watoto wa kike,tutawalinda siku zote mchana na usiku".amesema Mhe.Dendego.

Licha ya hayo ameagiza watoto wapewe kipaumbele katika kusoma kwa kushiriki masomo darasani na wenzao hata kwa wale ambao hawana sare za shule wasirudishwe nyumbani bali wapewe nafasi huku wakiendelea kuwa na utayari.

"Watoto wasio na uniform wasifukuzwe darasani,tunachotaka watoto wapate elimu,na katika Mkoa wa Singida kwasasa tuna operesheni ya kutokomeza matokeo ya daraja la nne na daraja ziro".

Sambamba na hilo,amesisitiza utunzwaji mzuri wa nyumba hizo za waalimu kwa kuhakikisha utunzwaji wa mazingira kwa kupanda miti maeneo yote yanayozunguka eneo hilo kwa lengo la kutunza mazingira lakini pia kujipatia kipato kutokana na miti kama aina ya mikorosho.

Pia ameagiza upatikanaji wa bendera ya Taifa shuleni hapo itakayotumika wakati wa kuimba wimbo wa Taifa,pia ameagiza ukarabati kwa Shule kuboreshwa zaidi na kuwa na muonekano wa kuvutia.