TOZO YA PUMBA NA MASHUDU YAKUBALIKA

Posted on: January 28th, 2022

Mkurugenzi wa Halmashauri ya Wilaya ya Itigi Bw. John Mgalula amewashauri wajumbe wa baraza la madiwani wa halmashauri hiyo kuridhia mpango wa kutoza ushuru  kwa mashudu ya alizeti na pumba za mahindi na mpunga yanayotumika kutengenezea  vyakula vya mifugo  kwa wanunuzi wanaovusha bidhaa hizo nje ya halmashauri.

Mheshimiwa Mgalula ametoa ushauri huo katika kikao cha Baraza la halmashauri akitolea ufafanuzi hoja ya Mh. Ali Minja,Diwani wa kata ya Itigi Majengo kuwa halmashauri inapaswa kufikiria vyanzo mbadala vya mapato badala ya kutoza ushuru kwa bidhaa za pumba na mashudu na kuwaongezea mzigo wananchi wanaotaka kujikwamua kiuchumikupitia ufugaji.

Bwana Mgalula amesema kuwa bidhaa hizo zitatozwa ushuru kulingana na uzito unaoanzia tani tano (5 ) na kuendelea  hususani kwa wafanyabiashara na wafugaji wanaovusha kwenda nje ya halmashauri na kusisitiza kuwa tozo hiyo haitamgusa mkazi wa ndani ya halmashauri anayetumia bidhaa hizo kwa shughuli za kawaida za kujiongezea kipato.

Akitolea ufafanuzi suala hilo Afisa kilimo Halmashauri ya Itigi Bw. John Chao ameeleza kuwa pumba na mashudu yatatozwa ushuru  kwa uzito wa tani moja kwa shilingi elfu tano(tani 1= tsh.5000)na kwa gari lililobeba bidhaa hizo pia litatozwa ushuru huku Mwanasheria mkuu wa Halmashauri Bw.Gilbart Kalanda  akiongeza kuwa katika mikoa mingine hasa ya kanda ya magharibi wamekuwa wamekuwa wakitoza ushuru kwa bidhaa hizo.

Akihitimisha mjadala wa hoja hiyo,Mwenyekiti wa Halmashauri ya itigi Mh.Hussein Ibrahim Simba amesema tozo hiyo imewalenga wafanyabiashara wakubwa   na haitawagusa wakaazi wa halmashauri yake kwa kuwa lengo la tozo hiyo ni kuongeza kipato kwa ajili ya ustawi wa halmashauri hiyo.