TUKAMILISHE UJENZI WA MADARASA KWA WAKATI-SERUKAMBA

Posted on: November 30th, 2022

Mkuu wa mkoa wa Singida Peter Serukamba ameiagiza halmashauri ya Itigi kutumia fedha za makusanyo ya ndani (own source) kujenga darasa moja kwa kila shule ya sekondari iliyopata fedha za ujenzi wa madarasa kutoka serikali kuu.

Mkuu wa mkoa ametoa maagizo hayo leo tarehe 30/11/2022 wakati wa ziara yake ya ukaguzi wa miradi ya ujenzi wa madarasa mapya kwa ajili ya wanafunzi wa kidato cha kwanza mnamo januari 2023 katika halmashauri ya Itigi na kusema kuwa halimashauri inapaswa kujenga angalau darasa moja kwa kila shule kumi zilizopata mgawa wa fedha kutoka serikali kuu ili kupunguza uhaba wa madarasa.

Pamoja na kuridhishwa na mwenendo wa utekelezaji, Serukamba amewataka  Mkuu wa wilaya ya Manyoni na Mkurugenzi mtendaji wa halmashauri ya Itigi kuongeza msukumo wa usimamizi wa ujenzi wa miundombinu hiyo ya elimu kwa kufanya ziara mara kwa mara ili iweze kukamilika kwa wakati na kwa viwango kulingana na thamani ya fedha zilizotolewa.

“Tunataka kufikia tarehe 15 mwezi ujao(Disemba) madarasa yote yawe yamekamilika na tuyakabidhi yakiwa complete”alisisitiza .

Kwa upande wake mkuu wa shule ya Sekondari ya Kimadoi Mwl.Juma Kirina ameishukuru serikali ya Jamhuri ya Muungano wa Tanzania inayoongozwa na Mh.Samia Suluhu Hassani kwa kuendelea kutoa fedha kwa ajili ya ujenzi wa vyumba vya madarasa na kusema  kuwa hatua hiyo itaongeza ari ya wanafunzi kujifunza kwa bidii na kuahidi kwamba madarasa hayo yatakamilika kwa wakati ili kuruhusu wanafunzi watakao chaguliwa kuanza kidato cha kwanza januari 2023 kuanza kuyatumia.