WADAU WA AFYA H'W ITIGI WAPEWA SOMO

Tarehe ya Kuwekwa: January 30th, 2023

Wadau wa afya wametakiwa kutoa elimu kwa jamii juu ya tabia chanya kuhusu huduma mbalimbali za afya kwa watu wenye maambukizi ya virusi vya UKIMWI pamoja na matumizi sahihi ya dawa za kufubaza makali ya virusi hivyo.

Akizungumza katika kikao kazi cha wadau wa afya kilichofanyika katika Halmashauri ya Wilaya ya Itigi juu ya mabadiliko ya tabia na uhamasishaji katika jamii,Mratibu wa shughuli za uhamasishaji na mabadiliko ya tabia katika jamii kutoka USAID-Afya Yangu Ndugu Kisibwi Maendeka  na kusisitiza kuwa kumekuwa na ongezeko la idadi ya watoro katika huduma za tiba na matunzo huku sababu ikibainishwa kuwa ni uelewa duni juu ya huduma mbalimbali za afya zinazotolewa kwa watu wenye maambukizi ya virusi vya UKIMWI.

Amesema USAID-Afya Yangu kwa kushirikiana na Serikali kupitia ngazi za halmashauri wameweka mikakati ya kupinga mila na imani potofu pamoja na tamaduni kandamizi ndani ya jamii  za kuzuia wengine wasipate huduma stahiki za afya

Awali akifungua kikao kazi hicho Mwenyekiti wa Halmashauri ya Wilaya ya Itigi Mh. Hussein Simba aamewashukuru wadau wa afya kutoka USAID-Afya yangu kwa kuiingza halmashauri hiyo katika mradi wa miaka mitano wa kusaidia watu wenye maambukizi ya virusi vya UKIMWI,TB na Uzazi wa mpango na kuwataka wadau wa afya  ngazi ya halmashauri kuwa chachu katika kuelimisha jamii nzima kuhusu masuala mbalimbali ya afya.

Kwa upande wake Mkuu wa Divisheni ya Utumishi katika Halmashauri ya Itigi  Bi. Joyce Masoga  kwa niaba ya wadau wa afya kutoka sekta mtambuka ngazi ya halmashuri amesema kuwa wapo tayari kwa kushirikiana na wadau wengine kutoa kuielimisha jamii kuhusu huduma mbalimbali za afya zinazotolewa na serikali ili kuwa na jamii yenye afya  kwa maendeleo ya Taifa.