WADAU WA HABARI WAHIMIZWA KUSHIRIKI KUINUA UBORA WA ELIMU NCHINI

Tarehe ya Kuwekwa: February 1st, 2023

Waandishi wa habari pamoja na Maafisa habari wametakiwa kuripoti mafanikio yaliyopo katika sekta ya elimu  yanayotekelezwa na serikali ili kujenga uelewa  katika  jamii.

Akizungumza katika kikao kazi kwa Waandishi wa habari wa mkoa wa Singida na Maafisa habari kutoka halmashauri zote za mkoa huo kilichoa andaliwa na Mradi wa SHULE BORA,Katibu Tawala wa mkoa wa Singida Mwl.Doroth Mwaluko amesema wanahabari wanamchango mkubwa katika kutoa elimu na uelewa chanya  kwa jamii ikiwa watatumia kalamu zao kwa njia inayofaa.

Amesema serikali imeendelea kufanya mambo makubwa katika sekta ya elimu nchini  jambo ambalo wananchi wanapaswa kufahamu kupitia taaluma ya uandishi wa habari huku akisisitiza matumizi mazuri ya utandawazi katika tasnia hiyo” utandawazi uendane na mila na desturi  za nchi ili uweze kuleta tija kwa jamii”alisema.

Pia Katibu Tawala amewataka wasimamizi wa Mradi wa SHULE BORA kutengenzea  mfumo wa mafunzo ya waalimu ndani ya Mkoa na kuandaa kituo/vituo kwa ajili ya waalimu watakao pata mafunzo kwenada kuwa fundisha waalimu wengine.

Nae mratibu wa programu ya SHULE BORA, Samwel Daniel amesema kuwa lengo la kikao kazi hicho ni kuwatambua wadau wa habari kuwa ni sehemu muhimu katika kutekeleza na kufika malengo ya mradi.

Amesema SHULE BORA ni mradi jumuishi hivyo ni lazima kuwatambua wadau mbalimbali wa elimu na kuwajengea uwezo ili wawe na uwezo wa kuchangia katika kuboresha elimu kupitia taaluma zao kwa kushirikiana na Mradi.”Tumeamua kuwakutanisha wadau mbalimbali ilikuwajengea uwezo na kuwapa ujuzi ili tuweze kushirikiana katika kutekeleza  mradi”alisisitza Daniel.

Kwa upande wake Mratibu wa mawasiliano na Mahusiano,Programu ya serikali ya SHULE BORA Bwana Raymond Kanyambo amebainisha kuwa Mradi wa SHULE BORA unafanya kazi pamoja serikali  za Mikoa na Halmashauri pamoja na shule katika Mikoa tisa yenye changamoto nyingi za kielimu huku Mradi ukikadiriwa kuwafikia watoto takribani Milioni nne wa kitanzania.

Ameitaja mikoa hiyo kuwa ni Singida ,Simiyu,Mara,Tanga,Dodoma ,Kigoma,Katavi,Rukwa na Pwani huku akianisha malengo ya Mradi  kuwa utatekeleza shughuli zake katika maeneo ya Kujifunza,Kufundisha, Jumuishi kwa maana ya kuandaa mazingira salama ili watoto wote waweze kumaliza elimu ya msingi na kuendelea na elimu ya sekondari na pia Kujenga mfumo wa kifedha serikalini kupita wahisani.

Shule Bora ni Mradi wa serikali ya Tanzania  kwa ufadhili wa serikali ya Uingereza kupita mfuko wa UK aid,  unaotekelezwa  katika mikoa tisa nchini kwa kipindi cha miaka sita (2021-2027)kwa lengo la kuinua ubora wa elimu nchini.