WAFAMASIA ITIGI DC,WAKUTANA KUWEKA MIKAKATI

Posted on: April 14th, 2023

Wamiliki wa maduka ya dawa muhimu pamoja na watoa dawa wametakiwa kufanya kazi zao kwa kuzingatia kanuni na taratibu za kitaaluma katika utekelezaji wa majukumu yao ili kuepusha madhara yanayotokana na matumizi  yasiyofaa ya dawa kwa binadamu

Akifunga kikao kazi cha wafamasia pamoja na wamiliki wa maduka ya dawa muhimu  katika halmashauri ya Itigi Afisa Lishe Bi.Darln Hassan kwa niaba ya Mkuu wa Divisheni ya Afya Ustawi wa Jamii na Lishe Dkt Emmanuel Mallange amesisitiza kuwa  wadau hao wanapaswa kutoa huduma kulingana na usajili wa maduka yao sambamba na kuhakikisha wale wote wenye maduka bubu wanasajili maduka yao mapema.

Naye Mfamasia wa Halmashauri ya Wilaya ya Itigi Bi. Scola Shunu amesema kuwa mwaka2022  uhakiki wavyeti vya watoa dawa ulifanyika na kubaini kuwa watu kumi na sita pekee kati ya arobaini na sita ambao walishiriki katika uhakiki huo  ndio walikuwa na vyeti halali na kuwataka wadau hao kuacha kughushi vyeti kwa kuwa kada hiyo ni nyeti na inagusa uhai wa binadamu moja kwa moja

Aidha amewataka wadau hao wa afya kuwa tayari kutoa elimu ya matumizi sahihi ya dawa kwa jamii kwa kuwa takwimu zinaonesha kuwa jamii bado haina uelewa wa kutosha wa matumizi sahihi ya dawa.

Kwa upande wake mmiliki wa duka la dawa muhimu Dkt. Mengi Kanazi amebainisha baadhi ya changamoto zinazowakabili watoa huduma hao wa dawa kwa ni pamoja na baadhi ya watoa dawa kuuza dawa  isiyofikia kiwango cha dozi hali inayopelekea usugu wa vimelea vya magonjwa pia kuangalia namna wamiliki wa maduka kuweka bei za dawa zinazolingana kwa maduka yote huku akishukuru kwa kikao kazi hicho kwa kuwakutanisha na kuwajengea uwezo utakao wasaidia kuongeza ufanisi katika majukumu yao.