WANANCHI KATA YA IPANDE WAKUMBUSHWA KUZINGATIA MASUALA YA AFYA

Tarehe ya Kuwekwa: August 21st, 2023

Wito umetolewa kwa wanaume kushirilkiana na wake zao katika masuala yanayohusu uzazi salama wenye kujali jinsia ili kuepusha vifo visivyo vya lazima vinavyoweza kutokea kwa akina mama wajawazito na watoto

Muuguzi Mkuu wa halmashauri ya Itigi Ndg.Frederick Gaisha amesema hayo katika mkutano na wananchi wa Kata ya Ipande halmashauri ya wilaya ya Itigi katika programu endelevu ya kutoa elimu ya uzazi salama ngazi ya jamii wenye kujali jinsia (RMNICAH) pamoja na kutoa hamasa ya ujenzi wa vyoo bora na usafi wa mazingira ngazi ya kaya,

Ndg.Gaisha amewataka akina mama wajawazito kuanza kuhudhuria kliniki mapema kabla ya miezi mitatu ili kufanyiwa uchunguzi pamoja na kujifungulia katika zahanati au hospitali ili kuepusha vifo vitokanavyo na uzazi.

Amesisitiza kuwa wanaume wanawajibu mkubwa wa kuwasaidia wake zao katika kipindi cha ujauzito hasa kuhakikisha wanamiliki mfuko wa maandalizi binafsi wa mama mjamzito kwa miezi nane kabla ya kumkabidhi mjamzito tayari kwa matumizi.

Vilevile Gaisha amewataka wanaume kuzingatia umuhumu na faida za lishe bora kwa mama mjamzito na wakati wa kunyonyesha  ili kuepusha madhara yanayotokana na ukosefu wa lishe ikiwa ni pamoja na udumavu au vifo kwa watoto wachanga huku akiwasisitiza wanaume kuwapunguzia kazi akina mama katika vipindi hivyo.

Kwa upande wake Afisa afya wa halmashauri hiyo Ndg. Lyambogo Malembo amewasisitiza wakazi wa Ipande kuzingatia sheria ndogo ndogo za usafi wa mazingira zilizopitishwa kupitia mikutano ya serikali ya Kijiji ikwa ni pamoja na ujenzi wa vyoo bora na kuvitumia.

Aidha Afisa afya amesema choo bora lazima kiwe na kuta nne ili kulinda faragha ya mtumiaji,paa,sakafu,maji pamoja na sabuni ili kijikinga na magonjwa ya mlipuko.