WANANCHI WAHIMIZWA KUTUNZA CHAKULA

Posted on: August 10th, 2023

Mkuu wa Wilaya ya Manyoni Mhe. Kemirembe Lwota amewataka wananchi kutunza na kuweka akiba ya chakula ili kuepuka changamoto ya uhaba wa chakula katika kipindi cha msimu wa masika.

Akizungumza katika Mkutano wa Baraza la Madiwani cha robo ya nne ya mwaka wa fedha 2022/2023, katika Ukumbi wa Mikutano wa Ofisi ya Mkurugenzi Mtendaji wa Halmashauri ya Wilaya ya Itigi pamoja na mambo mengine amewaagiza Madiwani kuwakumbusha wananchi katika maeneo yao kutunza chakula walicho nacho kwa kuwa taarifa za awali za hali ya hewa zinaonesha huenda kukawa na kiwango kikubwa cha mvua na kusababisha changamoto katika shughuli za kilimo.

Aidha Mhe Lwota ameiagiza Halmashauri kuongeza kasi ya ukusanyaji wa mapato pamoja na kukamilisha ujenzi wa Maegesho ya maroli ili halmashauri iweze kukusanya mapato.

Wakati huo huo, Mhe Lwota amezitaka taasisi za TANESCO,TARURA na RUWASA kuwasilisha taarifa za utekelezaji kwa wakati pamoja na kuhudhuria vikao vya kikanuni katika halmashauri hiyo.

Kwa upande wake, Mwenyekiti wa halmashauri ya Wilaya ya Itigi Mhe. Hussein Simba amewasisitiza Waheshiwa Madiwani na wataalamu katika Ofisi ya Mkurugenzi kuendelea kufanya kazi kwa ushirikiano katika kuwasaidia wananchi kufikia maendeleo .

Naye Mwenyekiti wa CCM wilaya ya Manyoni Ndg.Jumanne Makanda ameipongeza Halmashauri ya Itigi kwa kasi ya utekelezaji wa miradi ya maendeleo na kuendelea kutekeleza ilani inayobeba maono ya serikali huku akiiomba sekta ya maliasili kuwasaidia wananchi katika suala la ulinzi kutokana na uvamizi wa wanyama pori ikiwemo tembo ambao wamekuwa wakisababishia hasara wananchi.