WATUMISHI WA UMMA WAKUMBUSHWA KUZINGATIA KANUNI ZA MAADILI YA UONGOZI

Posted on: September 7th, 2022

Watumishi wa umma wametakiwa kufanya  kazi kwa weledi na kwa kuzingatia kanuni ,sheria ,taratibu za maadili ya uongozi ili kuepuka migongano ya kimaslahi katika jamii na kusababisha watu kukosa  imani na taasisi za umma.

Hayo yamesemwa na Katibu msaidizi Idara ya Ukuzaji wa Maadili kutoka Ofisi ya Rais Sekritarieti ya Maadili ya Watumishi wa Umma Ndugu Salvatory Kilasara katika kikao kazi kwa watumishi wa Halmashauri ya Itigi kilichofanyika katika ukumbi wa mikutano wa ofisi ya  halmashauri hiyo.

Ndugu Kilasara  amesema kuwa  kuna baadhi ya mambo ambayo watumishi wa umma hawapaswi kufanya kulingana na miongozo ya kanuni za maadili ya utumishi wa umma ili kuepuka kuingia katika migongano ya kimaslahi ikiwa ni pamoja kupokea zawadi kutoka kwa wananchi.

Aidha Mkufunzi huyo amewakumbusha watumishi kuwa waaminifu na wakweli kwa  kuheshimu dhamana walizopewa huku wakizingatia  tamko la uadilifu walilolitoa  wakikumbuka kuwa wanawajibika mbele ya jamii na taifa.

Kwa upande wake Afisa Uchunguzi mwandamizi kutoka Ofisi ya Rais Sekritarieti ya Maadili ya Watumishi wa Umma Bi.Modesta Anatoli Mtui amesisitiza watumishi kuwa  makini na matumizi taarifa  akisema kuwa siyo kila taarifa za kitaasisi ni taarifa za wazi huku akibainisha kuwa moja ya malengo ya viongozi wa umma ni kujenga imani kwa wananchi kwa serikali yao.

Bi.Mtui ameongeza kuwa  Rais wa Jamhuri ya Muungano wa Tanzania Mh.Samia Suluhu Hassan amesema kuwa kila mtumishi atapimwa kulingana na uwajibikaji wake na kwamba atalazimika kuwajibika kibinafsi kulingana na  matkeo mabaya ya uwajibikaji wake.

Awali akifungua kikao hicho Mkurugenzi Mtendaji wa Halmashauri ya Itigi Bwana John Mgalula ametawaka watumishi hao kuzingatia maelekezo watakayopata katika kikao kazi hicho kwa kuwa yatawasaidia kuboresha utendaji kazi wao wa kila siku.

Nae Mwenyekiti wa Halmashauri ya Itigi Mh.Hussei Simba amewashukuru maafisa hao kutoka Ofisi ya Rais Sekritarieti ya Maadili ya Watumishi wa Umma kwa mafunzo hayo kwa kuwa yataleta tija kwa viongozi hao kwa wanachi na taifa kwa ujumla.