DC MAMYONI-''MARUFUKU KUUZA MAENEO YA MALISHO''

Posted on: November 12th, 2022

.Mkuu wa Wilaya ya Manyoni Bi. Rahabu Mwagisa amepiga marufuku kuuzwa maeneo malisho  ya mifugo yaliyotengwa kwa ajili ya wafugaji.

Mkuu huyo wa Wilaya ametoa katazo hilo katika kikao chake cha hadhara na wakazi wa Mji wa Itigi kilichofanyika katika kijiji cha Songambele  kilicholenga kusikiliza kero za wananchi na kuzipatia majibu  pamoja na kuwafahamisha mambo ambayo serikali yao inayoongozwa na Rais wa Jamhuri ya  Muungano wa Tanzania Mh. Samia Suluhu Hassani inafanya.

Bi Mwagisa amesema kuwa kumekuwa na utaratibu wa watu kuuza maeneo yaliyotengwa kwa ajili ya malisho ya mifugo katika maeneo mbalimbali katika wilaya ya Manyoni jambo ambalo ni kosa kiseria na kwamba ofisi yake ilisha kemea suala hilo na kulitolea muongozo.

Amesema suala hilo likifumbiwa macho linaweza kusababisha mgogoro mkubwa wa ardhi miongoni mwa jamii kama ilivyo katika maeneo mengine nchini na kuagiza kusitishwa kwa shughuli zozote kutoka kwa mtu huyo anaedaiwa kuuziwa eneo hilo wakati serikali ikiendelea kufuatilia ili kujiridhisha juu ya jambo hilo.

Hilo limeibuka baada ya Bw. Joseph Sazii mkazi wa kijiji cha Sambuu kumueleza Mkuu wa wilaya kuwa kuna eneo la malisho lililotengwa katika kijiji hicho limevamiwa na kuuzwa kwa ajili ya matumizi tofauti na ilivyokusudiwa.