H'W ITIGI YAONGOZA KATIKA KAMPENI UTOAJI CHANJO UVIKO-19 MKOA WA SINGIDA

Posted on: July 12th, 2022

Watu 15,852 wamepatiwa chanjo ya UVIKO-19 ikiwa ni sawa na asilimia 145 na kufanya jumla ya watu waliochanjwa kufikia 27,373 katika Halmashauri ya Wilaya ya Itigi .

Akitoa taarifa katika kikao cha kutoa tathimini ya kampeni ya chanjo ya UVIKO-19 iliyofanyika kuanzia Juni 29 hadi Julai 5,2022,Mganga mkuu wa Halmashauri ya Wilaya ya Itigi Dkt.Emmanuel Mallange amebainisha kuwa lengo la serikali ni kuwafikiwa wanachi wote ili wapatiwe chanjo dhidi ya ugonjwa hatari wa UVIKO-19.

Dkt.Mallange amebainisha kuwa jumla ya dozi 16500 zimetumika huku 6,750 zikiwa zimebaki na zinaendelea kutumika katika vituo vya kutolea huduma za afya huku akianisha baadhi ya changamoto ikiwa ni pamoja na uchache wa watumishi,bajeti ndogo iliyopangwa kwa halmashauri ya Itigi na upungufu wa mafuta kwa ajili ya usafiri.

Aidha Dkt,Mallange amewakumbusha viongozi wa dini na serikali kuwahamasisha wananchi katika maeneo yao kushiriki kikamilifu katika zoezi la sensa ya kitaifa itakayoanza Agosti 23 mwaka huu.

Awali akifungua kikao, Mwenyekiti wa Halmashauri ya Itigi Mh.Hssein Simba ameipongeza Idara ya Afya katika halmashauri kwa kufikia lengo la kampeni hiyo pamoja na changamoto zilizojitokeza na kuongeza kuwa  jitihada hizo sambamba na utekelezaji wa miradi mbalimbali ya maendeleo  zimepelekea Halmashauri ya Itigi kwa mwaka huu kupata hati safi.

Naye Mwenyekiti wa Kijiji cha Songambele kilichopo katika mji wa Itigi Bwana Robson Mlangida ametoa rai kwa viongozi wa dini na serikali kutumia majukwaa yao kutoa elimu kwa jamii kuhusu umuhimu wa chanjo ya UVIKO-19 huku akibainisha kuwa bado kuna maeneo mengi hayajafikiwa ikiwemo kijiji cha Songambele.

Kampeni hii imefanyika katika kata 13 na vjiji 36 katika Halmashauri ya Wilaya ya Itigi kwa mtindo wa nyumba kwa nyumba na mikusanyiko ya hadhara.