KERO YA MAJI KIHANJU YAPATA MWAROBAINI

Tarehe ya Kuwekwa: September 13th, 2022

Mkuu wa mkoa wa Singida Mh.Peter Serukamba amewataka wananchi wa Kijiji cha Kihanju  kilichopo katika halmashauri ya Itigi Mkoani Singida kuunda chombo cha kusimamia matumizi ya Maji katika mradi wa maji uliokabidhiwa leo Novemba 13,2022 ili uweze kuwa endelevu.

Serukamba amesema hayo katika hafla ya makabidhiano maalumu ya mradi wa maji baina ya shirika la WaterAid ambao ni watekelezaji wa mradi,Kampuni ya bia Tanzania  SBL ambao ni wawezeshaji wa mradi ,RUWASA ambao ni wasimamizi pamoja na wakaazi wa Kijiji cha Kihanju yaliyofanyika katika eneo la mradi huo.

Amesema pamoja na mambo mengine chombo hicho kina wajibu wa kusimamia na kuratibu matumizi ya maji ikiwa ni pamoja na kupanga bei ya maji kwa kuwa sera ya maji inamtaka kila mtumiaji wa wahuduma hiyo kuchangia gharana za uendeshaji wa mradi sanjari na kuhakikisha miundombinu ya mradi inabaki kuwa salama.

Kwa upande wake Mkurugenzi Mtendaji wa Shirika la WaterAid Tanzania  Bi. Anna Mzinga ameishukuru serikali pamoja na mdau SBL kwa kufanikisha utekelezaji wa mradi huo kwa kuwa lengo la shirika hilo ni kuhakikisha linafikisha huduma maji kwa jamii na kuunga mkono kaulimbiu ya kumtua Mama ndoo kichwani.

Nae Mkurugenzi Mtendaji wa  kampuni ya SBL amebainisha kuwa mradi huo umegharimu kiasi cha shilingi milioni 290 mpaka kukamilika kwake na kuongeza kuwa ni matarajio yake kwa niaba ya kampuni kuwa mradi huo utaleta tija kwa wakaazi wa kijiji cha Kihanju na maeneo ya jirani  kwa kuwasaidia kupata maji safi na salama pamoja na kutumika katika shughuli mbalimbali za kiuchumi.

Mwisho