MAAFISA UGANI HALMASHAURI YA ITIGI WAPATIWA PIKIPIKI

Tarehe ya Kuwekwa: June 16th, 2022

Halmashauri ya Wilaya ya Itigi imepokea  pikipiki 16 kutoka Serikali kuu kwa ajili ya Maafisa ugani ili waweze kuwafikia wakulima kwa urahisi  katika maeneo yao na kuleta tija.

 Mgeni rasmi katika hafla ya mapokezi ya pikipiki hizo,Mwenyekiti wa Halmashauri ya Itigi Mh. Hussei Simba  amesema serikali imetoa pikpiki hizo ikiwa ni sehemu ya vitendea kazi kwa Maafisa ugani ili kuwasaidia kutekeleza majukumu yao kwa ufanisi.

Mh.Simba amempongeza Rais wa Jamhuri ya muungano wa Tanzania Mh.Samia Suluhu Hassan kwa kuona umuhimu mkuwa wa Maafisa ugani na kuamua kuwapatia vitendea kazi ili kuchochea ufanisi katika sekta ya kilimo nchini.

Awali akisoma taarifa fupi ya mapokezi ya pikipiki 16 zilizoletwa katika halmashauri ya Itigi Afisa kilimo,Umwagiliaji na Ushirika wa halmashauri hiyo Bw. Mkinguzi Mgalula amewataka Maafisa ugani kuuthamini uwezeshwaji huu wa vitendea kazi na kuongeza uwajibikaji katika maeneo yao na kuacha kufanya kazi kwa mazoea.

Kwa upande wake Kaimu Afisa Usafirishaji Bw. Geofrey Nguli amewataka Maafisa ugani waliokabidhiwa pikipiki kuzitumia kwa kuzingatia maelekezo ya serikali ya vyombo vya usafiri kama ilivyoelekezwa kwenye sheria.

Aidha ,Nguli amesisitiza kuwa kila afisa ugani anapaswa kutimiza majukumu yake kikamilifu ya kuwahudumia wananchi kwa kufika katika maeneo yao ili kutekeleza falsafa ya Mh. Rais inayosema “Kazi Iendelee”.