MAFUNZO KAMPENI YA CHANJO YA POLIO HALMASHAURI YA ITIGI YAFANYIKA

Posted on: April 24th, 2022

Jamii imetakiwa kushiriki katika kampeni ya kitaifa ya chanjo ya ugonjwa wa polio awamu ya pili ili kuwakinga watoto wenye umri chini ya miaka mitano dhidi ya ugonjwa huo.

Akizungumza wakati wa ufunguzi wa mafunzo kwa wahamasishaji ngazi ya jamii kuhusu kampeni ya chanjo ya polio katika halmashauri ya Itigi Mganga mkuu wa mkoa wa Singida Dk.victorine Ludovick amesema kampeni hii imekuja mara baada ya ugonjwa huo kuripotiwa katika nchi jirani ya malawi na kuongeza kuwa kuna uwezekano mkubwa wa ugonjwa huo kuingia nchini.

Dk.Ludovick amesema anaimani zoezi la utoaji chanjo ya polio katika halmashauri  ya Itigi litafanikiwa kwa asilimia mia moja kutokana muitikio mkubwa wa wahamasishaji ngazi ya jamii''naamini mtaenda kuwahamasisha watu washiriki kikamilifu zoezi hili muhimu ili tuweze kulikinga taifa letu dhidi ya ugonjwa huo hatari'' alisema Ludovick.

Naye muuguzi mkuu wa Mkoa wa Singida Bi,Hyasinta Alute amesema kuwa kwa sasa nchi ipo katika dharura ya kupambana na ugonjwa wa polio na kuwataka wadau  wa  afya watakaoshiriki katika zoezi hilo kuhakikisha kila mtoto anapatiwa chanjo.

 Mganga mkuu wa halmashauri ya Itigi Dk.Emmanuel Mallange akawapongeza wahamasishaji ngazi ya jamii kwa kuitikia wito wa dharura na kuhudhuria mafunzo hayo''mmechukua hatua ya kizalendo kuitikia wito wa dharura kuja kwenye mafunzo haya ya jinsi ya kutoa chanjo ya polio ikiwa ni kampeni ya kitaifa''amesema Dk Mallange.

Aidha Mwenyekiti wa kijiji cha Ipande na mhamasishaji ngazi ya jamii Bwana Julius Labia amesema kuwa mafunzo hayo yamewasaidia kuwa na uelewa wa kutosha juu ya ugojwa wa polio na pamoja na njia nzuri ya kuhamasisha jamii kushiriki kikamilifu katika kampeni hiyo.

Kwa upande wake Bi,Merry Amasi ambaye ni mhudumu wa afya ngazi ya jamii amewaomba wakazi wa halmashauri ya Itigi kuunga mkono zoezi hilo''watu wasiwe na hofu,wajitokeze kuunga mkono zoezi hili ili kuwakinga watoto wetu dhidi ya ugonjwa wa polio''.

Kampeni hii ya kitaifa ya utoaji wa chanjo dhidi ya ugonjwa wa polio katika halmashauri ya Itigi itaanza tarehe 28 hadi 31 aprili kwa watoto wote wenye umri chini ya miaka mitano.