MASUALA YA AFYA NA LISHE KUWA AJENDA YA KUDUMU HALMASHAURI YA ITIGI

Tarehe ya Kuwekwa: February 2nd, 2022

Idara ya Afya  ya Halmashauri ya Wilaya ya Itigi kitengo cha lishe kimefanya kampeni ya vitamini A, Ugawaji wa dawa za kutibu minyoo tumbo na kufanya tathimini ya LISHE kwa watoto wenye umri wa kuanzia miezi sita hadi miezi hamsini na tisa (miezi 6 -59) ambapo walengwa wamefikiwa kwa asilimia 129.6 sawa na watoto 28372 kati ya walengwa 21881.

 Mratibu wa lishe na Muuguzi Mkuu wa Halmashauri ya Wilaya ya Itigi,Bw. FREDERICK GAISHA amesema hayo wakati akiwasilisha TAARIFA YA UTEKELEZAJI MASUALA YA LISHE kwa kipindi cha robo ya pili ya  Oktoba hadi Disemba 2021 na kuongeza kuwa Halmashauri ilipanga kufanya jumla ya shughuli nane za afua za lishe kwa thamani ya shilingi12,091,000,hata hivyo Idara imefanikiwa kufanya jumla ya afua za lishe tatu kwa thamani ya shilingi 5,287,000.00 sawa na asilimia 43.7.

Aidha katika kipindi hiki cha robo ya pili  mkazo wa utoaji chakula / uji umeendelea kutolewa  katika shule ya Msingi Mlowa kwa wanafunzi wa Elimu maalum ikiwa jumla ya Shilingi 1,806,000 zikitolewa kutoka ruzuku ya serikali kuu huku  shule ya msingi Itigi –Reli,St. Vicent,St.Francis Exavier Maranatha nazo zikitekeleza mpango huo.

Bw. FREDERICK GAISHA amesisitiza kuwa viongozi wa Halmashauri kuanzia ngazi ya jamii, kisiasa ,kidini na wadau wote wa Afya washiriki katika kuhamasisha jamii kula MLO KAMILI kutoka makundi matano ya chakula na mtindo bora wa maisha  sanjari na akina mama kuanza  mapema kliniki ya ujauzito ili waweze kupata msaada wa kitaalam kwa wakati .

Akitoa maelekezo kwa Idara ya Afya MKURUGENZI WA HALMASHAURI HIYO MH.JOHN MGALULA amesema pamoja na idara hiyo kufanya vizuri katika  afua za lishe lakini bado inahitaji kuongeza nguvu ili kuhakikisha  matatizo ya utapiamlo na udumavu pamoja na changamoto nyingine za kisekta zinatatuliwa kwa asilimia mia moja.