MPANGO WA BAJETI 2022-2023 WAAKISI MAENDELEO HALMASHAURI YA ITIGI

Tarehe ya Kuwekwa: January 28th, 2022

Halmashauri ya Wilaya ya Itigi ilikisia kupokea Ruzuku na kukusanya mapato ya ndani zaidi ya bilioni kumi na tano(15,231,229,907.00)kwa mwaka wa fedha 2020-2021.

Akiwasilisha taarifa ya mapitio ya mwaka 2020-2021, mwenendo wa bajeti ya mwaka 2021-2022 na mapendekezo ya mpango na bajeti ya Halmashauri ya Wilaya ya Itigi kwa mwaka wa fedha 2022/2023 Afisa Mipango wa Halmashauri hiyo Bw.Regan Daniel Mumba  amebainisha vyanzo mbalimbali  ambavyo Halmashauri  imekusanya mapato ikiwa ni pamoja na mapato ya ndani,ruzuku kutoka serikali kuu na wadau wa maendeleo.

Aidha Halmashauri iliidhinishiwa kutumia kiasi cha Tsh.15,265,635,270.00 kwa matumizi mbalimbali ikiwa ni pamoja na Mishahara,matumizi ya mengineyo na miradi ya maendeleo.

Akichangia hoja kuhusu randama ya mapendekezo ya Mpango wa Bajeti hiyo Mkuu wa Wilaya ya Manyoni Mh. Rahabu Mwagisa  ameipongeza halmashauri ya Itigi kwa mwenendo wake wa ukusanyaji mapato na matumizi hasa katika utekelezaji wa miradi mbalimbali ya maendeleo.

Hata hivyo, Mkuu huyo wa Wilaya  amesema kuwa pamoja na halmashauri hiyo kutekeleza  kwa wakati na kwa viwango miradi ya ujenzi wa madarasa amesema kuwa mahudhurio ya wanafunzi waliochaguliwa kuanza kidato cha kwanza mwaka huu ni kwa kiwango chini na kuitaka halmashauri hiyo kuhakikisha wanafunzi wote waliochaguliwa wanaripoti shuleni.

Akizungumzia hali ya kilimo ,Mkuu wa Wilaya ameiagiza halmashauri kuhakikisha mbegu za alizeti  aina ya Record zilizoletwa na serikali zinawafikia wakulima mahali walipo ili waweze kununua kwa bei nafuu na hata kukopeshwa ili zitumike katika msimu huu wa kilimo ikiwa ni maelekezo ya serikali.

Kikao hiki cha kuwasilisha taarifa ya mapitio ya mwaka 2020-2021, mwenendo wa bajeti ya mwaka 2021-2022 na mapendekezo ya mpango na bajeti ya Halmashauri ya Wilaya ya Itigi kwa mwaka wa fedha 2022/2023 kimehudhuriwa na wajumbe mbalimbali akiwemo Mbunge wa Jimbo la Manyoni magharibi Mh.Yahaya Masere, Mwenyekiti wa CCM Wilaya ya Manyoni Bw.Jumanne Ismail Makanda,Kamati ya ulinzi na usalama ya wilaya,Madiwani ,Wakuu wa idara  na wataalam  kutoka Halmashauri ya Wiaya ya Manyoni.