MRADI WA SGR WAJA NA FURSA HALMASHAURI YA ITIGI

Tarehe ya Kuwekwa: April 23rd, 2022

Halmashauri ya Itigi Mkoani Singida imetakiwa kujiandaa kuupokea mradi wa ujenzi wa reli ya treni ya mwendo kasi kwa kipande cha Makutupora hadi Tabora kwa kuwa mradi unaweza kuchochea fursa za kiuchumi sanjari na kuibua changamoto mbalimbali zikiwemo ja kijamii na za kimazingira.

Hayo yamesemwa na Afisa Jamii kutoka shirika la reli Tanzania Bw.Leordgard Otaru wakati wa kikao cha kujengeana uwezo baina ya maafisa wa mradi wa SGR pamoja na wakuu wa idara mbalimbali katika ofosi ya halmashauri ya Itigi.

Bwana Otaru amesema kuwa mradi umejipanga vizuri kupitia uzoefu kukabiliana na changamoto mbalimbali zitakazojitokeza wakati wa utekelezaji wa mradi'' wapo watu au taasisi zitalazimika kuondoka katika maeneo yao kupisha mradi watahitaji fidia ,mabadiliko ya ghafla ya mpango mji yote haya yanaweza kusababisha malalamiko kutoka kwa jamii''alisrma Otaru.

Naye Mkandarasi kutoka shirika la reli Tanzania Injinia Juma Lugema amesema mradi wa SGR kipande cha Makutupra  hadi Tabora chenye urefu wa kilometa 368 kitakamilika ndani ya miezi  46 chini ya mkandarasi Yapi Markez kitagharimu fedha takribani shilingi trilioni 4.472.

Injinia Lugema amesema kuwa mradi katika kipande hiki utatoa fursa mbalimbali za kiuchumi ikiwa ni pamoja na ajira za moja kwa moja takribani mia saba''ongezeko la watu litachechemua biashara mbali na ajira za moja kwa moja zaidi ya miasaba'' alisema Lugema.

Aidha Mganga mkuu wa Halmashauri ya Itigi Dk.Emmanuel Mallange amesisitiza kuwa wakati wote wa utekelezaji wa mradi lazima masuala ya afya yapewe kipaumbele''ili mradi uwe na tija kwa jamii ni lazima masuala ya afya yazingatiwe ili kuepuka mangonjwa ya mlipuko'' alisema Dk Mallange.