RC SINGIDA : TUTAENDELEA KUSHIRIKIANA NA MASHIRIKA YA KIDINI ILI KUBORESHA UTOAJI WA HUDUMA ZA KIJAMII

Posted on: May 14th, 2024

Serikali ya Mkoa wa Singida imewahakishia Wadau wa Maendeleo ikiwemo Uongozi wa Hospitali ya Mtakatifu Gaspar ya Halmashauri ya Itigi Wilayani Manyoni kuwa itaendelea kudumisha ushirikiano uliotukuka katika shughuli mbalimbali wanazofanya ikiwemo utoaji wa huduma bora za msingi na za kibingwa za afya kwa wananchi wa mkoa huo.

Mkuu wa mkoa wa Singida Mheshiiwa Halima Dendego, ametoa kauli hiyo (tarehe 14/May/2024) wakati anazungumza katika maadhimisho ya Miaka 35 ya Hospitali ya Mtakatifu Gaspar Itigi.

Halima Dendego, amesema amefurahishwa na kazi kubwa inayofanywa na Viongozi na Watendaji wa Hospitali hiyo katika utoaji wa huduma za kiwango cha juu za afya ikiwemo mama na mtoto pamoja na uboreshaji majengo na vifaa tiba.

“Baraka na mkono wa Mungu uwe pamoja nasi na tuendelee kumwomba ili aendelee kutubariki zaidi ya hapa, Mhe. Halima Dendego.

Mkuu wa mkoa huyo amesema yeye na Watendaji wake wataendelea kutoa ushirikiano ili kuhakikisha mashirika yenye nia njema ya kuwaletea maendeleo ya uhakika wananchi wa mkoani Singida yanafikia malengo yao kwa kutoa huduma zao bila usumbufu wowote.

Aidha amesisitiza Viongozi wa Hospitali ya Matakatifu Gaspar Itigi kama wanachangamoto yoyote ambayo inaweza kusababisha kudumaza au kuchelewesha utoaji wa huduma za afya kwenye Hospitali hiyo wamweleze ili aweze kuzitafutia majawabu haraka iwezekanavyo ili wananchi waendelee kupata huduma bora za kisasa za afya.

Naye, Mkurugenzi wa Hospitali na Chuo cha Mtakatifu Gaspar Itigi Padre Justin Boniface, ameeleza kuwa mafanikio waliyoyapata katika utoaji wa huduma za msingi na za kibingwa za afya ni kwa sababu na ushirikiano mkubwa na karibu wanaoupata kutoka Serikalini.

Amesema mkakati wao ni kuhakikisha kuwa Hospitali ya Mtakatifu Gaspar ambayo kwa sasa inahudumia wagonjwa wengi kutoka maeneo mbalimbali ya mkoa wa Singida na nje ya mkoa huo inakuwa bora katika utoaji wa matibabu ya kisasa nchini ambapo kwa sasa wameanza ujenzi wa kitengo cha kusafisha damu kwa sababu ya uhitaji mkubwa wa wananchi.