RC.MAHENGE ASIKILIZA KERO ZA WANANCHI KATA YA MITUNDU NA ITIGI

Posted on: June 16th, 2022

Wakazi wa halmashauri ya Itigi mkoani Singida wametakiwa kuthamini na kuunga mkono jitihada mbalimbali za serikali za kuwaletea maendeleo katika maeneo yao.

Hayo yamesemwa na Mkuu wa mkoa wa Singida Dkt .Binilith Mahenge katika mikutano ya hadhara ya kusikiliza na kutolea majibu kero na changamoto za wananchi katika Kata ya Mitundu na Itigi mkoani Singida na kusisitiza kuwa serikali inatekeleza  miradi mingi ya maendeleo ikiwemo ujenzi wa barabara kwa kiwango cha lami kuanzia Mkiwa kuelekea mkoa wa Mbeya ,miradi ya maji,elimu, afya na kuwataka  waunge mkono jitihada hizo za serikali ya kuwaletea wananchi maendeleo.

Hata hivyo,Dkt, Mahenge amebainisha baadhi ya kero zinazowakabili wananchi ni pamoja na malalamiko ya wazee kuhusu kutonufaika na mfuko wa Maendeleo ya Jamii TASAF na kumtaka Mratibu wa TASAF katika halmashauri hiyo Bw. Valence Kilasara kushughulikia suala hilo mapema.

Aidha Mkuu wa  Mkoa amesikiliza kero  zinzohusu migogoro ya ardhi ikiwa ni pamoja na wananchi kugombania maeneo,upimaji na urasimishaji na kumuagiza Afisa Tawala  wa Wilaya ya Manyoni pamoja na wataalamu kutoka Hlmashauri ya Itigi kutatua kero hiyo.

Kwa upande mwingine Dkt .Mahenge amefuta utaratibu uliotumiwa na Watendaji Kata wa Itigi wa kuwapata vijana wanaotaka ajira za muda katika mradi wa ujenzi wa reli ya treni ya mwendo kasi kwa kuwa haukuwa wa uwazi na kuagiza kuwa mchakato huo lazima uwe shindanishi ili kila mtu apate ajira kwa haki.

Akitolea ufafanuzi suala la uchimbaji madini katika eneo la hifadhi lililoibuliwa na Mwenyekiti wa Kijiji cha Mitundu Bwana Peter Jackson Mkowa akiomba serikali iwaruhusu wananchi wa eneo hilo kuchimba madini katika eneo la hifadhi kwa kufuata sheria na taratibu ili waweze kujiinua kiuchumi,Mkuu wa Mkoa  ameahidi kutembelea eneo linalodaiwa kuwa na madini ya dhahabu na kupata ushauri kutoka kwa wataalamu ili kuona ikiwa hakutakuwa na athari endapo madini hayo yataruhusiwa kuchimbwa  ndani ya Hifadhi.