TAWIRI YATOA MAFUNZO YA KUWADHIBITI TEMBO

Tarehe ya Kuwekwa: October 26th, 2022

TAASISI YA UTAFITI WA WANYAMAPORI TANZANIA (TAWIRI)CHINI YA WIZARA YA MALIASILI NA UTALII IMETOA ELIMU NA MAFUNZO  YA UTATUZI WA  MIGONGANO BAINA YA  WANYAMAPORI  NA BINADAMU KWA KUTUMIA MBINU RAFIKI ZA KUDHIBITI WANYAMAPORI WAHARIBIFU KWA WAKULIMA 30 KUTOKA KATA NNE ZA MWAMAGEMBE,SANJARANDA,ITIGI MAJENGO NA KITARAKA KATIKA HALMASHAURI YA ITIGI MKOANI SINGIDA

Timu hiyo ya wataalamu kutoka TAWIRI ikiongozwa na  Dkt Janemary Ntalwila imewafundisha wananchi baadhi ya mbinu za kuwadhibiti tembo ikiwa ni pamoja na Vitisho vya mwanga,Vitisho vya sauti(Vuvuzela au honi kali),Mabomu ya pilipili,Matumizi ya fataki,Uzio wa vitambaa vyenye mafuta ya oili na pilipili,Tofali la pilipili na matumizi ya fensi ya mizinga ya nyuki.

Aidha wamefundishwa njia mbadala ya upandaji wa mazao kinga katika maeneo yanayoathirika na tembo kuwa ni njia nzuri ya kupunguza migongano .

Baadhi ya mazao hayo ni pamoja na tumbaku,pilipili,ufuta na tangawizi ambayo yanaweza kupandwa kuzuunguka shamba au kama mazao mbadala.

Njia hizi zimethibitika katika maeneo mengi kuwa na matokeo chanya ya kupunguza uvamizi na uharibifu wa mazao na madhara mengine yanayotokana na uvamizi wa wanyamapori hao waharibifu.

Sambamba na njia hizi  wananchi hao wamepatiwa elimu ya baadhi ya vyanzo vya migongano baina ya wanyamapori na binadamu ikiwa ni pamoja na ongezeko la watu jirani na maeneo ya hifadhi, mabadiliko ya tabia ya nchi,kufungwa kwa mapito ya wanyamapori, mabadiliko ya tabia za wanyamapori na kutokuwepo kwa mipango ya matumizio bora ya ardhi.