WADAU WA AFYA HALMASHAURI YA ITIGI WAHIMIZWA KUCHAPA KAZI KWA WELEDI

Posted on: June 15th, 2022

Wadau wa afya katika halmashauri ya Itigi wametakiwa kufanya kazi kwa weledi ili kuisaidia Serikali kutekeleza Mkataba wa Utendaji kazi na usimamizi wa shughuli za Lishe nchini.

Akizungumza katika kikao kazi cha kuhuisha mkataba wa Lishe na Tamko la Jiongeze Tuwavushe Salama Mkuu wa Wilaya ya Manyoni Bi. Rahabu Mwagisa amewataka Waganga wafawidhi wa vituo vya afya na watendaj wa Kata katika halmashauri hiyo kutambua kuwa serikali imefanya jambo kubwa kwa kuingia mkataba huo na kuwataka  kutekeleza maagizo wanayo pewa na serikali ili mkataba huo uweze kuleta tija.

Mkuu huyo wa Wilaya amesikitishwa na baadhi ya waganga wafawidhi pamoja na watendaji wa Kata kushindwa kuwasilisha ripoti za utendaji kazi kwa wakati na kuwasisitiza kufanya hivyo ili kuunga mkono jitihada za  Rais wa Jamhuri ya Muungano wa Tanzaia mhesimiwa Samia Suluhu Hassan katika kutekeleza majukumu yake kwa upande wa sekta ya afya.

Mkurugenzi Mtenadaji wa halmashauri ya Itigi Bwana John Mgalula amemuagiza Mganga Mkuu wa halmashauri hiyo kumpelekea  barua  ya wanganga wafawidhi wote walioshindwa kuwasilisha ripoti zao kwa wakati na kusababisha halmashauri kuonekana kushindwa kutimiza matakwa ya mkataba huo.

Awali akitoa taarifa ya mkataba wa Lishe na Tamko la Jiongeze Tuwavushe Salama awamu ya kwanza,Mganga Mkuu wa halmashauri ya Itigi,Dkt.Emmanuel Mallange amesema kuwa halmashauri imejipanga kuendeleza mafanikio yaliyopatikana katika awamu ya kwanza ya Mkataba huo na kuzitaka Kata zilizoshindwa kuwasilisha taarifa kwa wakati kuona umuhimu wa kufanya hivyo huku Muuguzi Mkuu wa Halmashauri hiyo Bwana  Frederick Gaisha akitoa wito kwa Watendaji Kata kutumia majukwaa yao kutoa elimu kwa jamii kuhusu masuala ya afya na lishe.

Ofisi ya Rais Tawala za Mikoa na Serikali za Mitaa (TAMISEMI) iliingia mkataba na Wakuu wa Mikoa ishirini na sita  wa Utendaji Kazi na Usimamizi wa Shughuli za Lishe Tanzania bara kwa awamu ya kwanza tangu Disemba 19,2017 na kufikia mwisho mnamo Juni 30,2021 na pande hizo mbili zimekubaliana kuongeza mkataba kwa kipindi cha miaka mitano hadi Juni 30, 2026.