WAFUGAJI NYUKI ITIGI DC WAUNDA JUMUIYA

Posted on: January 25th, 2023

Jumuiya mpya ya Vikundi vya Wajasiria mali wa ufugaji wa nyuki katika halmashauri ya Itigi wametakiwa kuwa na ushirikiano,umoja na nia thabiti ili jumuiya hiyo iweze kupiga hatua za kimaendeleo.

Akizungumza na wanajumuiya  kutoka vikundi 23 vinavyounda jumuiya hiyo  Mkuu wa Divisheni ya Ardhi na Maliasili Ndg. John Makotta amesisitiza kuwepo kwa umoja na ushirikiano baina yao ili waweze kujisimamia wenyewe na kuifanya  jumuiya  kuwa imara  na kwamba serikali  kupitia wizara ya maliasili na  utalii ipo tayari kutoa mafunzo ya ufugaji bora wa nyuki na biashara.ya asali na mazao yake.

Amesema kuwa serikali ina nia thabiti ya kuwainua wananchi kiuchumi  kupitia shughuli mbalimbali wanazofanya katika maeneo yao na kuongeza kuwa serikali hutoa fursa nyingi kupitia jumuiya na vikundi vilivyosajiliwa rasmi.

Nae Afisa biashara  Ndg. Emmanuel Mlenge amesema kupitia kuanzishwa kwa jumuiya hiyo wanaweza kupata fursa nyingi zikiwemo urahisi wa kupata mikopo kutoka katika taasisi za kifedha sanjari na kupata soko la uhakika la bidhaa wanazozalisha.

Pia Mlenge amewakumbusha umuhimu wa kuweka taarifa na kukmbukumbu za shughuli za kila siku zinazofanywa na jumuiya ili waweze kutambua muelekeo wa biashara ili kufikia malengo huku Mwanasheria wa halmashauri ya Itigi Ndg. Gilbart  Kalanda akiitaka jumuiya kuandaa katiba ambayo itawaongoza na kuweka muelekeo na malengo ya jumuia ambayo pia kutakuwa na sheria ndogo zitakazodhibiti ubadhilifu katika biashara ya asali na mazao yake ndani ya eneo la halmashauri.

Kwa upande wake Bwana Hamisi Samade  ambaye ni mwanajumuiya  kutoka kikundi cha ufugaji wa nyuki cha Itigi ameshukuru serikali kwa kuwaunga mkono na pia anaona kuwa jumuiya hiyo  hatimaye itakuwa  taasisi kubwa ambayo itawanufaisha wanajumuiya na jamii kwa ujumla.

Kwa upande mwingine Jumuiya  imefanya uchaguzi wa viongozi kujaza nafasi mbalimbali ambapo nafasi ya Mwenyekiti wa jumuiya  imekwenda kwa Bwana Elfasi E. Lwanji na Makamu wa Mwenyekiti ni Bi. Saada Ramadhani,Katibu wa Jumuiya ni Bw. Hamisi Samade na Katibu msaidizi ni Hamisi Ali huku nafasi ya Mweka Hazina ikichukuliwa na Bi.Wanjita  Clement.

Jumuiya ya Vikundi vya Wajasiria mali wa ufugaji wa nyuki katika halmashauri ya Itigi ambayo imepewa jina la   Jumuiya ya Wafugaji wa Nyuki Muhesi inaundwa na wanachama kutoka vikundi 23 vya wafugaji wa nyuki kutoka  Itigi,Mitundu,Kayui,Doroto,Kitaraka,Sanjaranda, Mwamagembe na Rungwa.