WAJUMBE WA MPDSR WAIBUKA NA MAAZIMIO

Tarehe ya Kuwekwa: May 1st, 2023

Wajumbe wa Kikao cha kujadili vifo vya akina mama vinavyotokana na uzazi pamoja na watoto wachanga (MPDSR) wameazimia kufanyia kazi changamoto mbalimbali zilizoainishwa na kujadiliwa katika kikao hicho ili kuzuia  vifo vya makundi hayo mawili.

Akifunga kikao kazi kilichofanyika katika halmashauri ya Itigi,Mganga mkuu wa Mkoa wa Singida Dkt.Victorina Ludovick amesema vifo vya akina mama vitokanavyo na uzazi pamoja na vifo vya watoto wachanga vimeendelea kuongezeka katika Mkoa wa Singida vikichochewa na sababu mbalimbali ikiwa ni pamoja na wazazi kutohudhuria kliniki au kituo cha kutolea huduma kwa wakati.

Amebainisha sababu nyingine kuwa ni pamoja na ubovu wa miundombinu ya barabara katika maeneo mengi hasa ya vijijini,uhaba wa dawa na vifaa katika vituo vya kutolea huduma sanjari na watoa huduma kushindwa kufanya maamuzi  sahihi ya kutoa rufaa kwa wakati.

Mganga Mkuu ameainisha takwimu za vifo vya akina mama na watoto wachanga kuwa tangu mwaka 2020 ni vifo 46 vya akina mama na 747 kwa watoto wachanga,2021 vifo 44 kwa akina mama na 681 kwa watoto na 2022 ni vifo 52 kwa akina mama na 540 kwa watoto wachanga na kusisitiza kuwa hali hii haikubaliki na kuongeza kuwa kikao kazi hicho kimewapa nafasi ya kuonyana,kukumbushana kuwajibika,kuboresha huduma na kuwa na takwimu sahihi.

Naye Muuguzi mkuu wa Mkoa wa Singida Hyasinta Alute ameshauri jamii ielimishwe juu ya umuhimu wa akina mama kuaza kliniki mapema ili waweze kupata huduna muhimu kwa wakati na kuongeza kuwa idara ya Afyamkoa imeendelea kushirikiana vizuri na mfumo wa M-MAMA ili kuokoa vifo vya akina mama na watoto wachanga.

Aidha Kiongozi wa timu ya Huduma Mkoba kutoka shirika la Marrie Stopes Bi. Flora Shirima ameseka kikao hiki kimeonesha maeneo ambayo yanahitaji kupewa kupaumbele na kuahidi kuwa ombi la kusaidia timu ya dharura ili kuokoa maisha ya makundi hayo mawili  ameyakariri na atayafikisha katika ngazi husika.

Kwa upande wake Meneja wa Damu salama Kanda ya kati Dkt. Kitura Mthias amesema Mkoa wa Singida umefanya vizuri katika ukusanyaji wa damu kwa asilimia 135.87 huku Mganga mkuu wa halmashauri ya Itigi Dkt. Emmanuel Mallange amewashukuru wajumbe kwa kushiriki vizuri katika kikao hicho na kusisitiza kuwa dhima ya kikao hicho ni kusema ukweli na kujifunza ili kuboresha mapungufu yanayojitokeza katika maeneo mbali mbali.