WALIMU NA MAAFISA ELIMU KATA WAPIGWA MSASA

Tarehe ya Kuwekwa: March 2nd, 2023

Maafisa elimu Kata,Wakuu wa Shule na Wenyeviti wa Kamati za shule wametakiwa kushirikiana ili kuhakikisha kila mtoto anapata elimu na kumaliza ili waweze kupata maarifa yatakayo wasaidia kuwa na uwezo wa kujitegemea .

Akifungua mafunzo ya kuwajengea uwezo wadau hao wa elimu ,Mkuu wa Divisheni ya Elimu Msingi na Awali Halmashauri ya Itigi Bi. Doreen Lutahanamilwa amesema kuwa programu ya SHULE BORA kwa kushirikiana na serikali inataka kuhakikisha mwanafunzi anapata elimu na  maarifa sahihi ili aweze kukabiliana na  changamoto za maisha.

Amesema wadau hao wa elimu wanaopata mafunzo wanapaswa kutambua kuwa wanadhamana kubwa ya kuinua  ubora wa elimu nchini kwa kukomesha utoro,mdondoko wa wanafunzi hususani wa kike na kuhakikisha watoto wote wanafaulu nakujiunga na masomo ya sekondari.

Naye Mratibu wa Mpango wa SHULE BORA katika halmashauri ya Itigi Ndg. Victor Mshana amebainisha kuwa moja ya malengo ya mafunzo hayo ni kuwafundisha namna ya kuanzisha Ushirikiano baina ya walimu na wazazi ili kusaidia kamati za shule katika kutekeleza mpango kazi yao na kuibua changamoto na jinsi ya kuzitatua.

Kwa upande wake Mkuu wa Shule ya Msingi Mitundu Mwl. Benjamini Lisu, amesema mafunzo hayo yamewasaidia kupata mbinu za kukabiliana na mdondoko wa elimu katika mkoa ikiwa ni pamoja na ushirikishwaji  wa kamati za shule pamoja na jamii.

Mradi wa SHULE BORA inatekeleza progamu hii katika mikoa tisa ikiwemo Dodoma,Katavi,Singida,Kigoma,Mara,Pwani,Rukwa,Simiyu na Tanga huku  baadhi ya vipaumbele vikiwa ni Kuimarisha uandikishaji wa wanafunzi,kuongeza idadi ya wanafunzi wanao maliza elimu ya msingi na Kuimarisha ufundishaji wa  KKK.