WAUGUZI NI UTI WA MGONGO WA SEKTA YA AFYA

Tarehe ya Kuwekwa: May 28th, 2022

Serikali  imewapongeza  wauguzi nchini kwa mchango wao katika sekta ya afya kwa kuendelea kutoa huduma nzuri kwa wananchi licha ya changamoto wanazokabili.

Akizungumza wakati wa maadhimisho ya siku ya wauguzi  yaliyofanyika katika halmashauri ya Itigi mgeni rasmi Mganga mkuu wa halmashauri hiyo  Dkt.Emmanuel Mallange kwa niaba ya Mkurugenzi mtendaji Bwana  John  Mgalula amesema kuwa wauguzi wanafanya kazi kubwa  na kwa weledi katika kutoa huduma kwa jamii.

Daktari Mallange amesema kuwa bado kuna upungufu wa wauguzi katika sekta ya afya hususani ngazi ya halmashauri na kuwataka kuufanya kazi kwa juhudi na maarifa licha ya changamoto hizo na kuahidi kuwa baadhi ya changamoto na maombi ya wauguzi hao kufanyiwa kazi

Awali akisoma risala Muuguzi mkuu wa halmashauri ya Itigi Bwana Fredrick Gaisha  amebainisha baadhi ya changamoto zinzowakabili wauguzi ikiwa ni pamoja na upungufu wa wauguzi,gari ya idara ya afya  na sare za kazi huku akisisitiza kuwa kada ya wauguzi inachangia nguvukazi  ya idara ya afya kitaifa kwa asilimia sitini na zaidi ya asilimia themanini ya huduma zote za afya hutolewa na wauguzi.

Kwa upande wake Mratibu wa afya ya uzazi na watoto katika halmashauri ya Itigi Bi.Fortunata Simon amewapongeza wauguzi kwa kuchagua wito mwema na kuwataka kufanya kazi kwa upendo  ili kuokoa maisha ya watu huku Bwana Abdallah Kitunga  mkazi wa Itigi majengo aliyefika kupata huduma  za upimaji wa afya akiwapongeza wauguzi kwa kazi nzuri.

Maadhimisho ya siku ya wauguzi katika Halmashauri ya Itigi yameenda sambamba na utoaji bure wa huduma za upimaji ugonjwa wa saratani ya shingo ya kizazi kwa akina mama,presha ,uzito,uchunguzi wa kifua kikuu,chanjo ya UVIKO-19 na kutoa elimu ya lishe juu ya makundi matano ya chakula huku kauli mbiu ikiwa ni WAUGUZI SAUTI INAYOONGOZA,WEKEZA KWENYE UUGUZI NA HESHIMU HAKI KULINDA AFYA KWA WOTE.